عبر عن حبك بايدك

موضوع: عبر عن حبك بايدك الخميس مايو 10, 2007 2:43 pm

الهدية من أهم الحاجات اللي ممكن بيها نقدر نعبر عن مشاعرنا.
لو فيه مناسبة بتدعو للاحتفال (عيد ميلاد أو عيد أي حاجة)، بتبقى فرصة لطيفة للتلكيك عشان نحتفل بأشخاص بعينهم.

ولو مفيش مناسبة، بتكون المفاجأة ألطف لو قدمنا هدية -أو لو جت لنا هدية- من أشخاص بنهتم بيهم.

الهدية مش لازم تكون شيء غالي، لأن الإحساس اللي وراها بيكون أهم من الفلوس.

اللمسات الشخصية، زي توظيف الذكريات المشتركة والكلمات الرقيقة بيكون لها وقع السحر على الإنسان اللي بنهدي له الهدية.

الأفكار الجاية هتكون عن اللمسات الشخصية الصغيرة اللي ممكن بسهولة جدا تتعمل في البيت، وغير مكلفة بالمرة.

1- عندي كلام كتييييييير lol!

:

في أحيان كتير بنحب نوصل رسالة للشخص اللي احنا مهتمين به، وممكن الرسالة دي تكون محتاجة أكتر من صفحة إذا كان الكلام كتير، ومن هنا جت فكرة الكتيب ده. كل اللي هتحتاجوه هو ورق كرتون (درجتين من لون واحد على الأقل)، وخيط (ممكن شريط ستان) وورق لف هدايا وورق كلك. استخدموا الخرامة مع الورق الكرتون وبعدين اربطوه بالخيط. ضيفوا الجيوب الداخلية والزقوها بالصمغ، وبعدين جهزوا الرسايل بتاعتكم في ورق بلون مختلف (باميل لخط الإيد أكتر من خط الكمبيوتر). مساحات الألوان مفتوحة قدامكم، وممكن تفننوا زي ما إنتم عاوزين.

2-بين الورق lol!

:

لو عاوز الشخص اللي إنت مرتبط بيه يفتكرك كل لحظة، ويتخيل صورتك بين سطور أي كتاب بيقراه يبقى الحل هو الـ"فواصل"، ودي باختصار قطعة الورق أو الكارتون اللي بنحطها في الكتاب عشان نحفظ احنا وقفنا فين في القراية من غير الاضطرار لثني الصفح أو الشخبطة عليها. مفيش أبسط من عمل الفواصل دي. قطعة كرتون بالمقاس اللي إنتم تفضلوه، تخرموها من فوق وتربطوا الخيط فيها. ممكن تستخدموا بواقي قماش في التصميم زي الصورة، وممكن –وده الأسهل- إنكم تكتبوا عليها رسالة ما بخط إيديكم وتلونوها.. ممكن كمان تلزقوا على قطعة الكارتون دي، مجموعة من الصور القديمة اللي ليها ذكريات معاكم.. وبرضه الفرصة مفتوحة للإبداع.

3-بحبك 365 مرة lol!

:

كل يوم هتقول لحبيبك إنك بتحبه بشكل مختلف، أو هتقول له بتحب فيه إيه؟ برطمان زجاج، وفيه 365 رسالة صغيرة مطوية لكل يوم من أيام السنة. بالذمة فيه أسهل من كده؟

4. وثيقة حبنا: lol!

نفس الفكرة اللي فاتت مع اختلاف التقنية! هتكتب للشخص اللي إنت بتحبه أسباب حبك له على ورقة كرتون، وتزوقها بالشكل اللي إنت تحبه. وتحطها في مكان بارز، تضمن إنه بيمر عليه كل يوم.. وتضمن برضه إنه هيشوف هديتك الجميلة دي ..

5- حاجة خاااصة جدا lol!

:

اللفتة دي هي المفضلة بالنسبة لي. وهي –ببساطة- إنك تهدي للشخص اللي إنت بتحبه حاجة من الحاجات القريبة منك قوي. زي مثلا دبدوبك المفضل، أو كتابك المفضل، أو أي شيء بتعزه جدا، وله عندك مكانة خاصة في قلبك. لفتة رقيقة مش كده؟

بصراحة كلها طرق جميلة لاظهار حبك لمن تحب طول الوقت lol!

ميرسي ليك كتير يا جميل

بجد طرق جميلة جدا و بسيطة خالص و بتعبر عن الاحساس

لا جاامدة والله يا موشى الطرق دى

اهى حاجة بسيطة وبتعبر

جميل ميرسى

الله يخليكم يا شباب

اتمنى اجبلكم كل جديد ومفيد

ولكم خالص تحياتى